ሚኒስተር ፍትሒ ወ/ሮ ፈውዝያ ሃሽም፣ ኣብ ምጅማር ትግባረ ስራሕ ምፍታሕ ክርክራት ዘተኮረ ርክብ ኣብ ዞባ ደቡብ ኣካይዳ

ብፍላይ ንኽብርን ኣገዳሲ ማሕበራዊ ስፍራን ስድራቤት ኣብ ግምት ብምእታው፡ ስድራቤታዊ ጕዳያት ናብ ኣብያተ-ፍርዲ ቅድሚ ምቕራቦም ብዕርቂ ከም ድቅሱ ዝገብር ኣሰራርሓ ይተኣታቶ ምህላዎም ዝሓበረት ሚኒስተር ፈውዝያ፣ እቲ መስርሕ ክንዮ ምፍታሕ ውልቀ-ጕዳያት ንሱር ናይቶም ፍልልያት ምሒኻ፤ ኣብ መንጎ ሰብ ነገር ልባዊ ዕርቂ ብምውራድ፣ ንዅሉ ወገን ብዘዕግብ መገዲ ነቲ ፍልልይ ሓንሳእን ንሓዋሩን ምዕራፍ ዘካተተ ምዃኑ ኣብሪሃ።

ኣስዒባ ሚኒስተር ፈውዝያ፣ መሰረታዊ ዕላማ ዕርቂ፣ ኣብቲ ጕዳይ ሰዓርን ተሰዓርን ምፍላይ ዘይኰነስ ኣብ ስርዓት ኣነባብራ ሕብረተሰብ መሰረት ብምግባር ንፍልልያት ብሰላም ምዕራፍ ብምዃኑ ብዝምኽኻር፤ እዞም ተረቚሖም ዘለዉ ሽማግለን ዓበይቲ ዓድን፣ ካብ ቀዳሞት ንዝወረስዎ ልቦናን መበቈላዊ ፍልጠትን ተጠቂሞም ሰላምን ስኒትን ኣብ ምዕዋት እጃሞም ከበርክቱ ተላብያ።  

ብተወሳኺ፣ ኣብ ካልኦት ዞባታት’ውን ተመሳሳሊ ርክብ ክካየድ ምዃኑ ኣብቲ ኣጋጣሚ ተሓቢሩ።